Hautnah - Geschichten über kleine Narben

Grosse Narben ziehen meistens sehr viel Aufmerksamkeit auf sich.
Man erwartet eine spannende, schreckliche oder faszinierende Geschichte dazu. Hier geht es um die kleinen Narben, die Alltagsnarben und die kurzen Geschichten dahinter, denn auch diese können spannende Stories erzählen.

Léonie

Ich han die Narbe vo minere Chnüüoperation, wil ich vor einehalb Jahr bim Ringtourne en Saltoabgang uf die dicki Matte gmacht han und det mis Chrützband und de Meniskus kabutt gmacht han. Denn han ich sone spezielli Operation gmacht. Die zwei chliine Narbe uf de Siite sind vom Meniskus und denn am Underschenkel und Oberschenkel hani zwei Narbe vode Federe wo ich mis Chnüü drigmacht worde isch, wo die beide Ende vom Chrützband wieder sett zemmebringe.

Léonie Bein

Das het mer im Chnoche befestigt. Ich find dNarbe sind relativ guet verheilt, die une gseht mer na chli aber das stört mich eigentlich nöd. Es isch wie en Ort, wo mer jetzt nöd so mega aneluegt. Ich leb guet demit, ich han gar keis Problem. Zum Teil hani eifach chli Schmerze im Underschenkel, bi gwüsse Bewegige wo ich im Chrafttraining mache, aber das isch nöd eppis wo ich im Alltag merke. Aber det tuets mer die Nächi vode Narbe ade einte Stelle weh. Das chenti sii, dass das na vode Narbe isch und dases mer wehh macht, wils unedraa nöd guet verheilt isch. Mitem Usehe hani überhaupt gar kei Problem.

Rebeka

Ich bin in Mexiko gsi am Reise und ich han es Velo gmietet gha, zum chli dur dStadt fahre und Sache gsehh. Ich han mich aber natürlich nöd uskennt und drum hani halt mengisch mis Handy usegnoo, zum de Weg nahluege. Einmal bini halt gfahre und han denn gliichzitig ufs Handy gluegt – nöd so vorbildlich, ich weiss – und denn hani grad so ufegluegt und gsehh, dass all Fahrzüüg vor mir bremsed, will rot isch. Vor mir isch es Töffli gsii.

Rebekas Bein


Ich han grad na so chene bremse, dass ich nöd voll is Töffli inecrasht bin. Ich bin aber gliich mitem Bei ah de Uspuff oder so vom Töffli cho. Ich han eigentlich mega welle Schreie, aber han nöd chene, will ich ja ih de Typ vor mir inegfahre bin. Ich han mich denn entschudligt und bin nachher ahhghalte zums ahluege. Det hets nanig so schlimm usgseh und s het jetzt au nöd so mega krass wehgmacht, aber scho biz. Ide nächste Täg hets denn gar nüm wehh gmacht, aber ich han sone mega fetti hässlichi bruuni Brandblase am Bei gha und wo die verheilt isch, isch halt de bruuni Fleck ah mim Bei zruggblibe. S stört mich jetzt nöd mega, aber ich finds scho nöd schön, eifach wils so gross isch. Ich han jetzt es Tattoo am Bei und das findi au nümm so schön, eifach will obedraa sonen hässliche bruune Fleck isch. S git aber schlimmers und s beschäftigt mich jetzt au nöd jede Tag.

Lisa

Lisa Bein

D’Vorgschicht isch, dass ich mini ganz Primar- und Sek-Ziit e Feindschaft gha han miteme Bueb, wo mit mir id Klass gange isch. Er isch eigentlich ih jedi Klass mit mir siit de 1. Klass. Mer hend immer gstritte und eus ghaue, oder? Halt Chinder. Ich bin wahrschinlich eppe 12i gsi, denn hetter wieder irgenden Scheiss gmacht und ich binem nahhgrennt. Im Singruum hemmer halt sone Tribühne gha, wo mer brucht hend wie eh Bühni und die het so mega scharfi Kante gha. Er isch det denn druf gumpt und ich binem halt nahhgumpt und ich han chli min Sprung unterschätzt und bin mitem Schiibei geg die Kante gheit. Nachher hets es Loch ide Hose und ih mim Bei gha, das isch nöd so geil gsi. Mitlerwiile isch alles guet, mer hend euses Kriegsbeil chenne begrabe und sind jetzt Kollege. Es gseht jetzt eifach nöd so geil uus und s wird wahrschinlich au nie weggah, will halt eifach es Stück vom Fleisch fehlt, es isch eifach grad de Chnoche unedra. Mer gsehts nöd mega guet, s isch nöd mega dunkel oder so, aber s isch halt ide Mitti vom Schiibei, drum chenti au recht guet ohni lebe.

Emma

Mini Narbe und Riffe ah mine Düüme chemed vo minere Dermatillomanie. Das isch e Impulskontrollstörig, wo ich nöd weiss, wieso ich die han. Ich han die aber scho lang, sicher scho sit über 10 Jahr und es stört mich sehr. Ich han aber mega lang nöd gwüsst, dass das eppis isch, wo anderi Mensche au hend. Ich han au mega lang denkt, dass das eifach e Macke vo mir isch. Es isch au im Alltag für mich nöd immer eifach, will ich immer extrem uf mini Finger konzentriert bin.

Emma Finger

Ich probier au immer, wenn ich mich ah Stange festheb oder Föteli mach, oder epperem dHand gib, dass mer das nie gseht. Ich bin denn au immer druf konzentriert, eb die Lüüt mer ufd Düüme gluegt hend und lueg dene drum immer voll id Auge. Es isch au so ahhh.. Ich freg mich au immer, eb ich de Lüüt devoo sett verzelle oder nööd. Mengisch hend denn ebe dLüüt sGfühl, sie chend mir helfe, indem sie mer denn ih so Moment, wo ich denn chnüble, seged, dass ich ufhöre sett. Es bringt aber genau nüüt, will ich das nöd eifach sii lah chan und nümm chan dra denke. Es isch immer ich mim Chopf wenn irgendwie es Hüütli abstaht oder so und s gseht halt eifach unschön uus, aber ich chan nöd demit ufhöre. Mega viel Lüüt spreched mich au druf ahh und freged denn, eb ich mini Finger verbrennt han oder mer id Finger gschnitte han und ich seg denn entweder ja voll oder ich seg halt dWahrheit, aber das isch au mega unahnehm, wenn mer dLüüt nöd lang kennt. S isch müehsam.

Nicolas

Das isch gsii bim Russlandvortrag. Ich han det grad irgendes Messer ufem Tisch gha und ich bin chli für de Vortrag am recherchiere gsi und han mini Händ chli müsse beschäftige. Denn hani halt ahhfange demit spiele und denn hani mich demit gschnitte, sehr fest. Denn han ich de Finger unters chalte Wasser hebe, um s Bluet wegzmache. Denn het min Vater gseit, dass ich das nöd sett mache, wils Bakterie im Wasser chend ha.

Nicolas Finger

Denn simmer is Spital gfahre. Det hani müsse warte und min Finger ih sones Bädli legge – ich glaub es Jodbad.Das hets denn desinfiziert. Denn hets gheisse, ich müsst Nähe. Sie hend zerscht denkt, dass ich en Nerv duregschnitte han und hend mer denn 20 Mal mitere Nadle in Finger pickst. Ich han immer gseit, dass ichs gspüür, aber sie hends immer namal welle mache. Denn han ich gfunde, ich han Angst vor Sprütze. Weg dem han ich mich ohni Betäubig Nähe lah. Nachher isch alles wieder guet gsi und ich han de Vortrag am nächste Tag nöd müsse mache. Ich freg mich amel, was ich mer denkt han. Sie steched mich ja gliich zum Nähe. Ich gspüürs eifach eppe nüün Mal anstatt einmal, aber ich glaub ich han eifach sehr Angst vor Sprütze, nöd vor Nadle. Jetzt störed mich dNarbe überhaupt nöd, ich merk nödmal, dass ich sie überhaupt na han.